თბილისი

ევროპის მრავალ ქვეყანაში, იანვარში, ჰაერის ტემპერატურამ წელიწადის ამ დროსთვის ისტორიულ მაქსიმუმს მიაღწია. როგორც BBC-ი წერს, 11 ქვეყანაში რეკორდულად მაღალი ტემპერატურა დაფიქსირდა.

პოლონეთის დედაქალაქ ვარშავაში გასულ კვირას ჰაერის ტემპერატურა 18°C იყო. ვარშავაში პირველ იანვარს დაფიქსირებული ჰაერის ტემპერატურა აქამდე არსებულ რეკორდულ მაჩვენებელზე 4 °C-ით უფრო მაღალი იყო. პოლონეთის ქალაქ შჩეცინში ჰაერის ტემპერატურის მატებას ალუბლის ნაადრევად ყვავილობაც კი მოჰყვა.

ესპანეთში, ბილბაოში გასულ კვირაში დაფიქსირდა 25°C, რაც ამ პერიოდისთვის დამახასიათებელ საშუალო ტემპერატურაზე 10°C-ით უფრო მაღალია. ამ რეგიონისთვის მოცემული ტემპერატურა ივლისის საშუალო ტემპერატურის ეკვივალენტია.

შვეიცარიაში ჰაერის ტემპერატურამ 20°C-ს მიაღწია. თბილმა ამინდმა გავლენა იქონია ალპების სათხილამურო კურორტებზე, სადაც თოვლის დეფიციტი იყო.

ბელარუსში დაფიქსირდა 16°C , რაც წინა რეკორდს 4.5°C -ით აღემატებოდა.

აღნიშნულის პარალელურად კი ჩრდილოეთ ამერიკა უკვე კვირებია, ძლიერ ყინვასა და შტორმს ებრძვის, რასაც 60-ზე მეტი ადამიანი ემსხვერპლა. სინოპტიკოსების ვარაუდით, ამერიკაში ძლიერი ყინვები კიდევ გაგრძელდება. კვლავ ელოდებიან დედამიწის ამ ნაწილში ძლიერი ყინვის გაგრძელებას.

სინოპტიკოსები განმარტავენ, რომ კლიმატის ცვლილების გამო, სიცხის ტალღები გახშირდა, უფრო ინტენსიური და ხანგრძლივი გახდა, რაც სამომავლოდ კიდევ მეტად შესამჩნევი გახდება.