თბილისი

ინდოეთის აღმოსავლეთ სანაპიროზე მდებარე ანდრა-პრადეშისა და ოდიშის შტატები ციკლონ Arnab-ის მოსვლას ემზადებიან. ხელისუფლება მოსახლეობის ევაკუაციისთვის ემზადება, რადგან პროგნოზით, სტიქია სანაპიროს ოთხშაბათს, 28 ოქტომბერს მიაღწევს. მოსალოდნელია ძლიერი ქარი და ინტენსიური წვიმა, რომელმაც შესაძლოა დატბორვა გამოიწვიოს.

Reuters-ის 26 ოქტომბრის ინფორმაციით, ციკლონი ბენგალის ყურეში ჩამოყალიბდა და ციკლონურ შტორმად გაძლიერდა. ინდოეთის მეტეოროლოგიური სამსახურის პროგნოზით, ის ოთხშაბათს დილით ანდრა-პრადეშის სანაპიროს მიაღწევს. ქარის დაბერვის სიჩქარემ შესაძლოა საათში 140 კილომეტრს მიაღწიოს, ხოლო შტორმი მანამდე კიდევ გაძლიერდეს.

ანდრა-პრადეშში დაახლოებით 570 000 ადამიანი პოტენციურად მოწყვლადად მიიჩნიეს. შტატის კატასტროფების მართვის სამსახურის წარმომადგენლის განცხადებით, მოსახლეობის ევაკუაცია ორშაბათ საღამოს უნდა დაწყებულიყო. ხელისუფლებამ ზღვაში მყოფ გემებს ნაპირზე დაბრუნებისკენ მოუწოდა და ელექტროენერგიის შესაძლო გათიშვის შემთხვევაში მისი მიწოდების სწრაფად აღსადგენად მზადება დაავალა.

პროგნოზით, ძლიერი ან უკიდურესად ძლიერი წვიმა მოსალოდნელია ანდრა-პრადეშის ჩრდილოეთ და ცენტრალურ სანაპირო რაიონებში, ასევე მეზობელი ოდიშის სამხრეთ ნაწილში.

ოდიშის შტატში სკოლები და კოლეჯები დროებით დაიხურება. ადგილობრივი ხელისუფლების გადაწყვეტილებით, სასწავლო დაწესებულებები ხუთ რაიონში სამშაბათსა და ოთხშაბათს არ იმუშავებს. პარალელურად, მიმდინარეობს დაბლობ და დატბორვის რისკის მქონე ტერიტორიებზე მცხოვრები მოსახლეობის ციკლონებისგან დასაცავ თავშესაფრებში გადაყვანისთვის მზადება.

ბენგალის ყურე ტროპიკული ციკლონების წარმოქმნის ერთ-ერთი მთავარი რეგიონია. სანაპირო დასახლებებისთვის მსგავსი შტორმები განსაკუთრებულ საფრთხეს ქმნის ძლიერი ქარისა და უხვი ნალექის გამო.