ციურიხი

აშშ-ში, შტატ ფლორიდას მე-3 კატეგორიის ქარიშხალი “მილტონი“ დაატყდა თავს. ფლორიდის სენტ-ლუსიის ოლქში სტიქიის შედეგად გარდაცვალების პირველი შემთხვევები უკვე დაფიქსირდა.

უცნობია გარდაცვლილთა რიცხვი, თუმცა ფლორიდის სენტ-ლუსიის ოლქის შერიფის განცხადებით, არის დაღუპვის “მრავლობითი შემთხვევა“, ხოლო ტერიტორია მთლიანად განადგურებულია.

“მილტონს აქვს პოტენციალი, იყოს ერთ-ერთი ყველაზე დამანგრეველი ქარიშხალი დასავლეთ-ცენტრალურ ფლორიდაში“, - განაცხადა აშშ-ის ქარიშხლების ეროვნულმა ცენტრმა.

ქარიშხალმა მთელ შტატში ტორნადოები გამოიწვია, ძლიერი ქარისა და წვიმის გამო, მილიონ მომხმარებელს ელექტროენერგია არ მიეწოდება. განადგურებულია ასობით საცხოვრებელი სახლი.

ადგილობრივი მოსახლეობა მცირეწლოვან ბავშვებთან ერთად, თავს საერთო თავშესაფრებს აფარებს.

ეროვნული გვარდიის ათასობით წევრი ქარიშხლის შემდეგ სამძებრო-სამაშველო სამუშაოების ჩასატარებლად მზად არის. პრეზიდენტ ბაიდენის ადმინისტრაციამ წინასწარ განალაგა რესურსები და ასობით პერსონალი.

ბაიდენმა ფლორიდა კატასტროფის ზონად გამოაცხადა, რათა სტიქიაზე რეაგირება გაადვილდეს.

შეგახსენებთ, რომ მოსალოდნელი საფრთხის გამო, წინა დღეებში მილიონობით ადამიანს სახლის დატოვების ბრძანება მიეცა. “მილტონს“ უკვე უწოდეს "ყველაზე ძლიერი ქარიშხალი, რომელიც ამ რეგიონს ბოლო საუკუნეში დაატყდა თავს".