თბილისი

ისლანდიის სამხრეთ-დასავლეთ ნაწილში, რეიკიანეს კუნძულზე, რამდენიმეკვირიანი ინტენსიური მიწისძვრის შემდეგ ვულკანი Fagradalsfjall-ი ამოიფრქვა. სეისმური აქტივობების დაწყებამდე მეთევზეთა ქალაქ გრინდავიკიდან დაახლოებით 4 000 ადამიანის ევაკუაცია მოხდა.

ისლანდიის მეტეოროლოგიური ოფისის თქმით, ვულკანი ადგილობრივი დროით 22:17 საათზე გააქტიურდა. მიწისძვრების აქტივობა გაზრდილია ისლანდიის დედაქალაქშიც. რეიკიავიკში ლამის ყოველდღიური მიწისძვრები ოქტომბრის ბოლოს დაიწყო.

სოციალურ მედიაში გამოქვეყნებულ სურათებსა და ვიდეოებში ჩანს, რომ ლავამ სეისმური მოვლენების დაწყებიდან ერთი საათის შემდეგ იფეთქა. მოსახლეობის თქმით, ვულკანის ამოფრქვევიდან მალევე, ცა მთლიანად წითლად შეიღება.

ისლანდია ვულკანის ამოფრქვევის მოლოდინში - ქალაქ გრინდავიკიდან მოსახლეობის ევაკუაცია ხორციელდება

ასობით მიწისძვრის შედეგად ირღვევა ბეტონის გზები, სახლების კედლები... დედამიწის ზედაპირზე გაჩენილი ბზარებიდან კი ორთქლი ამოდის - ისლანდია კვლავ ვულკანის ამოფრქვევის მოლოდინშია

ვულკანის დანახვა შესაძლებელი იყო რეიკიავიკიდანაც, რომელიც გრინდავიკის ჩრდილო-აღმოსავლეთით, მისგან 32 კილომეტრში მდებარეობს.

ისლანდიის პრემიერ-მინისტრის თქმით, მიღებული თავდაცვითი ზომები დადებით შედეგს გამოიღებს და მაქსიმალურად ნაკლებ ზიანს მიიღებს ქვეყანა. ვულკანის ამოფრქვევის შესახებ ისლანდიის პრეზიდენტმა გუდნი იოჰანესონმაც გააკეთა განცხადება. მან აღნიშნა, რომ მოსახლეობის სიცოცხლის დაცვა მათი უმთავრესი პრიორიტეტია და ასევე სტრუქტურების დასაცავადაც არ დაზოგავენ ძალისხმევას.