თბილისი

რამდენად უნდა ციოდეს გარეთ, რომ დახურულ სივრცეებში გათბობა ჩავრთოთ? - აციებასთან ერთად ეს კითხვა საკმაოდ აქტუალური ხდება. ადამიანების ნაწილმა უკვე ჩართა გათბობა, ნაწილი კი კიდევ უფრო აციებას ელოდება.

ეს გადაწყვეტილება პირველ რიგში თავად ადამიანების ბუნებაზეა დამოკიდებული, თუ რამდენად უყვართ მათ სითბო. როდესაც ოჯახში ხანდაზმული ან ბავშვია გათბობის ჩართვა უფრო ადრეა სასურველი, რადგან მათ სიცივის მიმართ მდგრადობა უფრო ნაკლები აქვთ.

ჯანდაცვის მსოფლიო ორგანიზაციის რეკომენდაციით, სტანდარტულად ოჯახში სასურველია ტემპერატურა მინიმუმ 17 გრადუსი იყოს. მაქსიმუმი კი 24 გრადუსი უნდა იყოს. შესაბამისად, როდესაც გარეთ ტემპერატურა 17 გრადუსზე დაბლა ჩამოდის, უკვე უნდა დაიწყოთ ფიქრი გათბობის ჩართვაზე. სახლში არსებულ ტემპერატურაზე გარე ტემპერატურის გარდა გავლენას ახდენს: სახლის იზოლაცია, ფანჯრის ტიპია, მინა, მზის პირდაპირი ნათება და სხვა. მზიან დღეებში გარე ტემპერატურა შეიძლება სახლის ტემპერატურაზე მაღალიც იყოს.

აქვე აღსანიშნავია, რომ ოპტიმალური ტემპერატურა ღამით უფრო დაბალი უნდა იყოს ვიდრე დღისით. სასურველია, საძინებელში უფრო დაბალი ტემპერატურა იყოს, ვიდრე - მისაღებ ოთახში.