თბილისი

ამერიკული კოსმოსური სააგენტოს NASA-ს განცხადებით, Voyager 2-მა დედამიწასთან კონტაქტი დაკარგა. შემთხვევა მას შემდეგ მოხდა, რაც დედამიწიდან მას არასწორი ბრძანება გაუგზავნეს.

შეცდომის შედეგად დედამიწისკენ მიმართული ანტენის ღერძი 2 °-ით გადაიხარა, რის გამოც ხომალდმა ინფორმაციის მიღების და გადაცემის უნარი დაკარგა. აღსანიშნავია, რომ მან ჯერ კიდევ 21 ივლისიდან შეწყვიტა ბრძანებების მიღება სახმელეთო მაკონტროლებლებისგან.

ამჟამად Voyager 2 დედამიწიდან 19,9 მილიარდი კილომეტრითაა დაშორებული და სივრცეში 55346 კმ/სთ სიჩქარით მოძრაობს. იგი კოსმოსში 46 წელია დაფრინავს. მიუხედავად ამისა, კომუნიკაციის აღდგენის იმედი მაინც არსებობს - NASA-ს კვლევითი ცენტრის განცხადებით, ისინი მუდმივად აგზავნიან სიგნალებს Voyager 2-ის ლოკაციაზე, მასთან კონტაქტის დამყარების მიზნით.

Voyager program - ამერიკული სამეცნიერო პროგრამაა, რომლის საფუძველზეც, 1977 წელს ნასამ მზის სისტემის მიღმა მდებარე სივრცის შესასწავლად, კოსმოსში ორი იდენტური ავტომატური კოსმოსური ზონდი "ვოიაჯერ 1" და "ვოიაჯერ 2" გაუშვა.

ზონდზე მიმაგრებულია მრგვალი ალუმინის ყუთი, რომელშიც მოოქრული ვიდეო დისკია. დისკი 115 სლაიდისგან შედგება, რომლებიც შეიცავს ყველაზე მნიშვნელოვან სამეცნიერო მონაცემებს, დედამიწის ხედებს, მის კონტინენტებს, სხვადასხვა პეიზაჟებს, სცენებს ცხოველებისა და ადამიანების ცხოვრებიდან, მათ ანატომიურ სტრუქტურასა და ბიოქიმიურ სტრუქტურას.