თბილისი

23 ივნისამდე მთელი საქართველოს ტერიტორიაზე არამდგრადი ამინდები შენარჩუნდება, თუმცა ნალექის ინტენსივობა იკლებს. 24 ივნისიდან ნელ-ნელა გამოიდარებს, 25 და 26 ივნისს ჩვენ უმეტესად უნალექო ამინდს ველოდებით, განსაკუთრებით დასავლეთ საქართველოში. აღმოსავლეთ საქართველოში კვლავ მცირე ნალექის შესაძლებლობას.

ასეთია ჰიდრომეტეოროლოგიური პროგნოზების სამმართველოს უფროსის სვეტლანა ნიორაძის კომენტარი მოსალოდნელ ამინდთან დაკავშირებით.

„ზაფხულის ამინდები ჯერ არ დაიწყება... 24 ივნისიდან 27 ივნისამდე კარგი ამინდი გვექნება, 27 ივნისის დღის მეორე ნახევრიდან 28-29 ივნისს კვლავ ველოდებით ამინდის პირობების გაუარესებას, დასავლეთ საქართველოს უმეტეს რაიონში, ხოლო აღმოსავლეთ საქართველოს ზოგიერთ რაიონშიც. ზოგადად, ივნისი, ისევე როგორც მაისი აღმოსავლეთ საქართველოში ნალექების და სეტყვიანობის მაქსიმუმით ხასიათდება. ანუ ის რაც ახლა ხდება, არაფერი უჩვეულო არ არის. გვქონია ნაკლებად ნალექიანი ივნისი, უფრო მეტად ნალექიანიც, მაგრამ ახლა ისე მოხდა, რომ ნალექების რაოდენობა ნორმაზე მეტი გვაქვს,“ - განაცხადა სვეტლანა ნიორაძემ.

მისივე განმარტებით, შესაძლოა წყალმოვარდნები კვლავ დაფიქსირდეს. ეს ნალექის ინტენსივობაზეა დამოკიდებული.

ჰიდრომეტეოროლოგიური პროგნოზების სამმართველოს ვარაუდით, ივლისშიც იქნება ნალექიანი პერიოდები, თუმცა მაღალ ტემპერატურასა და უნალექო დღეებსაც უნდა ველოდოთ.