თბილისი

ესპანეთსა და პორტუგალიაში ძლიერი წვიმისა და ქარის გამო საგანგებო ვითარებაა. პორტუგალიაში შტორმ Charles-ის მოახლოების გამო სკოლები დაიხურა, ესპანეთში კი კაშხლის გადავსების საფრთხის გამო ათასობით ადამიანის ევაკუაცია გახდა საჭირო.

იბერიის ნახევარკუნძულის ქვეყნებში ამინდი მკვეთრად გაუარესდა. ესპანეთსა და პორტუგალიაზე ორი ატმოსფერული სისტემა - Bruna და Charles - ახდენს გავლენას, რასაც ძლიერი ნალექი, ქარის გაძლიერება და წყალდიდობის საფრთხე ახლავს. ესპანეთის სახელმწიფო მეტეოროლოგიური სააგენტოს (AEMET) პროგნოზით, 11 ნოემბერი ამინდის გაუარესების ერთ-ერთი ყველაზე რთული დღეა.

პორტუგალიაში შტორმ Charles-ის გამო ხელისუფლებამ საგანგებო ზომები მიიღო. დაიხურა სკოლები და არასასიცოცხლოდ მნიშვნელოვანი საჯარო დაწესებულებები. მოსახლეობას კი მოუწოდეს, აუცილებლობის გარეშე სახლიდან არ გასულიყო. ქვეყნის მეტეოროლოგიურმა სამსახურმა (IPMA) რამდენიმე ოლქში ძლიერი ქარის გამო წითელი დონის გაფრთხილება გამოაცხადა. პროგნოზის თანახმად, ქარის სიჩქარემ ზოგიერთ რაიონში შესაძლოა 120 კმ/სთ-ს მიაღწიოს. რთული ვითარებაა სანაპირო ზოლშიც, სადაც ძლიერი ღელვა და მაღალი ტალღებია მოსალოდნელი.

ესპანეთში მთავარ საფრთხეს უხვი ნალექით გამოწვეული წყალდიდობა წარმოადგენს. განსაკუთრებით საყურადღებოა ავილას პროვინციაში შექმნილი ვითარება, სადაც კაშხლის გადავსების რისკის გამო დაახლოებით 3 000 ადამიანის ევაკუაცია დაიგეგმა. AEMET-ის გაფრთხილებით, ქვეყნის ზოგიერთ რაიონში ნალექის რაოდენობამ შესაძლოა 24 საათში 120 მმ-ს გადააჭარბოს, ცალკეულ ტერიტორიებზე კი კიდევ უფრო მაღალი მაჩვენებელი დაფიქსირდეს.

მეტეოროლოგების პროგნოზით, რთული ამინდი 12 ნოემბრამდე შენარჩუნდება. ძლიერი წვიმა, ქარის დაბერვა და სანაპირო ზოლში შტორმული ზღვა კვლავ ქმნის დატბორვისა და ინფრასტრუქტურის დაზიანების საფრთხეს.