თბილისი

თელავის მუნიციპალიტეტში მოსულმა უხვმა ნალექმა თელავის ხევის ადიდება და კალაპოტის გარღვევა გამოიწვია. ქალაქის ქუჩებში მოვარდნილმა წყალმა მნიშვნელოვნად დააზიანა ინფრასტრუქტურა: დაიტბორა კავკასიონისა და ალაზნის გამზირების ნაწილი, საცხოვრებელი კორპუსების პირველი სართულები, აფთიაქები, მაღაზიები და სხვა კომერციული ფართები. სტიქიამ ასევე დააზიანა ელექტროგადამცემი ხაზები და ქუჩებში გაჩერებული ავტომობილები.

უამინდობამ ქალაქის გარდა მუნიციპალიტეტის რამდენიმე სოფელიც დააზარალა, მათ შორის წინანდალი, კისისხევი და კურდღელაური. ამ ტერიტორიებზეც ადიდდა ხევები, რამაც სასოფლო-სამეურნეო სავარგულებისა და ვენახების დატბორვა გამოიწვია.

წინანდალში შექმნილი მდგომარეობა განსაკუთრებით მძიმეა. სტიქიის მასშტაბი განაპირობა იმამ, რომ მთიდან ჩამოტანილმა ხეებმა და მასამ მდინარის კონკრეტული მონაკვეთი ჩაკეტა. კალაპოტიდან გადმოსული წყლის ნაკადი ვენახებისკენ წავიდა და ალაზნამდე არსებული დიდი ფართობები დააზიანა.

ადგილობრივი მევენახეების ინფორმაციით, ზარალი უდიდესია და ბევრ ნაკვეთში მოსავლისა და ვაზის მინიმუმ 70% განადგურებულია. ზოგიერთ ფართობზე წყალმა ნიადაგი ისე წალეკა, რომ ვენახების ადგილას ახლა ჩვეულებრივი მდინარის კალაპოტია შექმნილი, რაც იქ სამომავლოდ ვაზის ხელახლა გაშენებას პრაქტიკულად შეუძლებელს ხდის.

გარკვეულ ნაკვეთებში მიწა კვლავ დატბორილია და ზარალის ზუსტი შეფასება, ისევე როგორც იმის გარკვევა, მოხერხდება თუ არა დაწვენილი ვაზის გადარჩენა და ფეხზე წამოყენება, მხოლოდ წყლის დაშრობის შემდეგ გახდება შესაძლებელი. ადგილობრივების თქმით, ამ ზონაში მსგავსი მასშტაბის ბუნებრივი მოვლენა არავის ახსოვს, რადგან მდინარე ვენახებიდან საკმაოდ მოშორებით მიედინება. მასშტაბური მატერიალური ზარალის მიუხედავად, სტიქიის შედეგად არავინ დაშავებულა.