ქართული
Русский
17 აპრილამდე საქართველოში გრილი და დროგამოშვებით ნალექიანი ამინდია მოსალოდნელი. უახლოესი დღეების პროგნოზზე გვესაუბრება გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსი სვეტლანა ნიორაძე:
- გუშინ საქართველოს მთელ ტერიტორიაზე ცივი და ნალექიანი ამინდი იყო, საკმაოდ დიდი ნალექი მოვიდა გუდაურში, სტეფანწმინდაში, ძირითადად აღმოსავლეთ საქართველოს მთიან და მაღალმთიან რაიონებში. დასავლეთ საქართველოში ყველგან წვიმდა, მაღალ მთაში თოვდა, მაგრამ აღმოსავლეთ საქართველოში უფრო ძლიერი ნალექი აღინიშნა. გუშინ ყველაზე მაღალი ტემპერატურა დასავლეთ საქართველოს დაბლობში +13 გრადუსი იყო, აღმოსავლეთ საქართველოს ბარში კი +15. დღეს კიდევ უფრო დაბალ ტემპერატურას ვვარაუდობთ, +5-10 გრადუსის ფარგლებში დასავლეთ საქართველოში და აღმოსავლეთ საქართველოს ბარში +8-13 გრადუსის ფარგლებში.
თბილისში დღეს ჰაერის ტემპერატურა +11-13 გრადუსის ფარგლებში დაფიქსირდება. ხვალ დილამდე იქროლებს დასავლეთის მიმართულების ძლიერი ქარი, თბილისში დროგამოშვებით 20-25 მეტრ წამამდე. 11 აპრილს დილიდან გამოიდარებს, ქარიც შესუსტდება, ტემპერატურა დასავლეთ საქართველოში 18 გრადუსამდე, აღმოსავლეთ საქართველოში კი 15 გრადუსამდე მოიმატებს. თბილისში 14 გრადუსია მოსალოდნელი. ხვალ გვიან საღამოს ისევ ყველგან გაწვიმდება დასავლეთ, აღმოსავლეთ საქართველოშიც და 12 აპრილის შუადღემდე მოსალოდნელია ცივი და ნალექიანი ამინდი. ტემპერატურა ისევ დაიკლებს. შედარებით ცივი და ნალექიანი ამინდი შენარჩუნებული იქნება 17 აპრილამდე.
მაღალ მთაში ისევ თოვლია მოსალოდნელი, როგორც დასავლეთ, ისე აღმოსავლეთ საქართველოში. სვანეთში, ზემო აჭარაში, ხევსურეთში, გუდაურში, სტეფანწმინდაში... ასეთი ამინდი აპრილის პირველი ნახევრისთვის უჩვეულო არ არის.
- როგორი ამინდი იქნება აღდგომას?
- სავარაუდოდ 17 აპრილიდან გამოიდარებს და აღდგომის დღეებში თბილი და უმეტესად უნალექო ამინდია მოსალოდნელი. გასათვალისწინებელია, რომ ამინდის პროგნოზის დაზუსტება ყოველდღიურად ხდება.
მანანა გაბრიჭიძე
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.