ქართული
English
CNN-ის მიერ გავრცელებული ინფორმაციის თანახმად, სატურნის საკულტო რგოლი მომავალში შეიძლება გაქრეს. NASA-ს სპეციალური მისია დაკვირვებას 13 წლის განმავლობაში ატარებდა და იკვლევდა საკითხს, თუ რამდენი ხანია სატურნს რგოლი აკრავს და კიდევ რამდენი ხანი შეიძლება ის იყოს ხილული.
მზის სისტემა და მისი პლანეტები დაახლოებით 4,6 მილიარდი წლის წინ ჩამოყალიბდა. თუმცა მეცნიერებს არ აქვთ დადასტურებული ინფორმაცია სატურნის რგოლების ასაკისა და წარმოშობის შესახებ. უახლესი დაკვირვების შედეგები კი მხარს უჭერს თეორიას, რომ სატურნის რგოლები თავად პლანეტის ჩამოყალიბებიდან დიდი ხნის შემდეგ გამოჩნდნენ.
"ჩვენი კვლევით დასტურდება, რომ სატურის რგოლები ასტრონომიული სტანდარტით ახალგაზრდაა. ის სულ რაღაც რამდენიმე ასეულ მილიონ წელს ითვლის. თუ სატურნის თანამგზავრულ სისტემას დავაკვირდებით, ვნახავთ მინიშნებებს, რომ იქ ბოლო რამდენიმე ასეული მილიონი წლის განმავლობაში რაღაც დრამატული მოხდა. რგოლები არ არის ისეთივე ძველი, როგორიც თავად პლანეტა. ეს ნიშნავს, რომ რაღაც მოხდა, რამაც მათი ფორმირება გამოიწვია,“ - ვკითხულობთ დასკვნაში.
მკვლევრების აზრით, სავარაუდოდ რგოლები ჯერ კიდევ ყალიბდებოდა, როდესაც დედამიწაზე დინოზავრები ბინადრობდნენ.
სატურნის რგოლები ძირითადად ყინულისგან შედგება. მისი შემადგენლობის მცირე ნაწილი კი მტვერია, რომელიც კოსმოსში ასტეროიდის მცირე ფრაგმენტებითა და მიკრომეტეორიდებით შეიქმნა. ისინი ეჯახება სატურნის რგოლებში არსებულ ნაწილაკებს და ქმნის მცურავ ნამსხვრევებს, როდესაც რგოლის მასალა პლანეტის გარშემო ბრუნავს.
როგორც უკვე აღვნიშნეთ, ახალმა კვლევამ დაასკვნა, რომ სატურნის რგოლებს დიდი ასტრონომიული დრო არ დარჩენიათ. ამ დასკვნას კი იმის საფუძველზე აკეთებენ, რომ რგოლები სწრაფად კარგავენ მასას. მათი ვარაუდით, რგოლები მაქსიმუმ მხოლოდ რამდენიმე ასეული მილიონი წლის იქნება.
სატურნის რგოლების შესწავლა მომავალშიც გაგრძელდება.
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.