თბილისი

ჩინეთში ექსტრემალური ყინვაა. ადგილობრივი მედიის ინფორმაციით, ძლიერი ყინვის შედეგად, პეკინში ტბები და მდინარეები გაიყინა.

საინტერესო ისაა, რომ ადგილობრივების ნაწილს ეს სულაც არ აწუხებს და დიდთოვლობა ზამთრის მხიარულ თავგადასავლად აქციეს.

ყინულად იქცა ჩინეთის უძველესი და უდიდესი, ნეიპაის პარკი, რომელიც 71 ჰექტარზეა გაშენებული. ახლა ეს ადგილი ტურისტებისა და ადგილობრივებისთვის სასრიალო სივრცეა.

"ძალიან კარგია ჩემს მეგობრებთან ერთად აქ სრიალი, ბევრი ხალხია და ძალიან სახალისოა. ყველას ვთავაზობ, მოვიდეს და სცადოს", - ამბობს პეკინში მცხოვრები სტუდენტი ჟენგ ჩუ ჰუანი.

ჩინეთში ბოლო 70 წელიწადში პირველად არის ასეთი ცივი ზამთარი. ჩინეთის ზოგიერთ ადგილას -40 გრადუსი დაფიქსირდა. ძლიერ ყინვას თან ახლავს დიდთოვლობა და ზოგიერთ რეგიონში ქარბუქი.

ჩინეთის დიდ ნაწილში, მათ შორის დედაქალაქში, -10 გრადუსი დაფიქსირდა. ქვეყნის ჩრდილოეთ და ჩრდილო-აღმოსავლეთ ნაწილში ყველაზე ცივი ტემპერატურა იყო, რადგან ცივი ჰაერის მასა არქტიკიდან სამხრეთით გადავიდა და ზოგიერთ რაიონში ტემპერატურა -40C-მდე დაეცა.