თბილისი

ზამთარში დაბალი ტემპერატურა, ყინვა, ქარი, წვიმა კანს განსაკუთრებულ სტრესს აყენებს. სიცივე იწვევს კანის მექანიკურ გაღიზიანებას, სიწითლეს, სიმშრალეს, ქრონიკული დაავადებების გამწვავებას, ალერგიული და ვირუსული დაავადებების პროვოცირებას. სიცივე მნიშვნელოვნად ამცირებს კანის დამცველობით, ბარიერულ ფუნქციას.

ზოგადად, კანს მოვლა ნებისმიერ სეზონზე სჭირდება, თუმცა ზამთარში მას განსაკუთრებული ყურადღება უნდა მივაქციოთ.

დამატენიანებელი კრემი უნდა წაისვათ სახლიდან სიცივეში გასვლამდე 30-40 წუთით ადრე. თუ ამ შუალედს არ დაიცავთ და სახლიდან გასვლის მომენტში წაისვამთ დამცავ და დამატენიანებელ საშუალებას, შეიძლება დადებითის ნაცვლად უარყოფითი შედეგიც კი მიიღოთ.

სიცივის ალერგია არის კანის რეაქცია გარემო პირობებზე. ის ძირითადად სხეულის დაუფარავ ზონებზე ვლინდება და გამოიხატება სიწითლით, გამონაყარითა და ქავილით. ხშირ შემთხვევაში, სითბოში შესვლის შემდეგ ჩივილები თავისით ალაგდება ხოლმე. მიუხედავად ამისა ეს პრობლემა უყურადღებოდ არ უნდა დატოვოთ და აუცილებლად მიმართოთ სპეციალისტს, რადგან ის დროთა განმავლობაში შეიძლება გართულდეს. გართულებულ ეტაპზე ხშირად ხდება კიდურების შეშუპებაც.

მნიშვნელოვანია, რომ სიცივეში გასვლის დროს ღია ზონები მაქსიმალურად დაიფაროს. რეკომენდებულია ქუდის, შარფის, ხელთათმანების გამოყენება.