თბილისი

პოლარული ციალი ერთ-ერთი ყველაზე შთამბეჭდავი ბუნებრივი ფენომენია ჩვენს სამყაროში. თავისი მრავალფეროვნებითა და ეფექტურობით ნათება მნახველებს ყოველწლიურად აოცებს.

ჩრდილოეთის ციალი არაერთი ფოტოგრაფის ობიექტივში მოხვედრილა. მარკუს ვარიკი ერთ-ერთია მათ შორის, ვინც ჩრდილოეთის ციალს მრავალი წელია, აკვირდება და იღებს. წელს კი მის ობიექტივში ავრორას სრულიად ახალი, შთამბეჭდავი ფერები მოხვდა. ნორვეგიის ცაზე 2022 წელს სრულიად განსხვავებული ნათების ნახვა იყო შესაძლებელი.

„უკვე 10 წელია, ავრორას ვიღებ. ვფიქრობდი, რომ უკვე ყველაფერი ნანახი მქონდა. თუმცა რაც ამჯერად ვნახე, ეს იყო სრულიად განსხვავებული და გასაოცარი რამ. ვარდისფერი იმდენად ინტენსიური იყო, რომ საკუთარ თვალებს არ ვუჯერებდი,“ - აღნიშნა მარკუს ვარიკმა SpaceWeather.com-თან საუბარში.

პოლარული ციალი მზის ქარისა და დედამიწის ატმოსფეროს შეხვედრით წარმოიქმნება. დედამიწის მაგნიტური ველის მიერ მართული მზის ქარის ნაწილაკები ეჯახება ატმოსფეროში არსებულ ჟანგბადსა და აზოტს და დროებით აცლის ელექტრონებს, რაც მათ კაშკაშს იწვევს. შედეგად ჩნდება თვალწარმტაცი მწვანე და წითელი ციალი.