თბილისი

იაპონიის აღმოსავლეთ ნაწილში, განსაკუთრებით ჩიბას პრეფექტურაში, ძლიერმა და რეკორდულმა წვიმებმა მასშტაბური წყალდიდობა გამოიწვია. Reuters-ის ინფორმაციით დაღუპულია სულ მცირე 8 ადამიანი. სტიქიამ დააზიანა საცხოვრებელი სახლები და გზები, შეფერხდა სარკინიგზო და საავტომობილო გადაადგილება.

ზოგიერთ რაიონში 24 საათის განმავლობაში 360 მილიმეტრზე მეტი ნალექი დაფიქსირდა. ჩიბას ქალაქში ერთ საათში დაახლოებით 115 მილიმეტრი წვიმა მოვიდა, რაც უკიდურესად ინტენსიურ ნალექად ითვლება. ასეთმა რაოდენობამ მოკლე დროში მდინარეების ადიდება და ქუჩების დატბორვა გამოიწვია.წყლით დაიფარა გზები, შეფერხდა მატარებლების მოძრაობა და ათასობით მგზავრი იძულებული გახდა, ღამე სადგურებსა და აეროპორტში გაეტარებინა. ნარიტას საერთაშორისო აეროპორტში დაახლოებით 7 000 ადამიანი ჩარჩა.

სტიქიამ ელექტროენერგიის მიწოდებაზეც იმოქმედა. დატბორილი ინფრასტრუქტურის გამო ელექტროენერგიის გარეშე ათიათასობით ოჯახი დარჩა, შეფერხებები კი სხვა კომუნალურ მომსახურებებსაც შეეხო.

სამაშველო სამუშაოებში ადგილობრივ სამსახურებთან ერთად იაპონიის თავდაცვის ძალების წარმომადგენლებიც ჩაერთნენ.

ძლიერი წვიმები იაპონიისთვის ახალი პრობლემა არ არის. ქვეყნის მთიანი რელიეფი, ხშირი მდინარეები და მჭიდროდ დასახლებული ურბანული ტერიტორიები მას წყალდიდობებისა და მეწყრების მიმართ განსაკუთრებით მოწყვლადს ხდის. იაპონიის სახელმწიფო სტრუქტურები აღნიშნავენ, რომ ბოლო წლებში ექსტრემალური ნალექით გამოწვეული წყალდიდობები და მეწყერები ქვეყნის სხვადასხვა ნაწილში თითქმის ყოველწლიურად ხდება.

კლიმატის ცვლილება ამ პრობლემას კიდევ უფრო ართულებს. იაპონიის გარემოს სამინისტროს შეფასებით, მომავალში ძლიერი ნალექის მოვლენების გაძლიერებამ შესაძლოა გაზარდოს მდინარეების ადიდების, წყალდიდობების, მეწყრებისა და ინფრასტრუქტურის დაზიანების რისკი. შესაბამისად, ქვეყნისთვის სულ უფრო მნიშვნელოვანი ხდება ადრეული გაფრთხილების სისტემები, წყალდიდობისგან დამცავი ინფრასტრუქტურა და მოსახლეობის დროული ევაკუაცია.