თბილისი

გარემოს ეროვნული სააგენტოს ინფორმაციით, საქართველოში, მათ შორის დედაქალაქში, არამდგრადი ამინდი 9 ივლისამდე შენარჩუნდება. ამ პერიოდში მოსალოდნელია ხანმოკლე, ადგილობრივად ძლიერი წვიმა, ელჭექი, ქარის გაძლიერება, ხოლო ცალკეულ რეგიონებში შესაძლოა სეტყვაც აღინიშნოს. სწორედ ასეთი ამინდი დაფიქსირდა 7 ივლისსაც, როდესაც თბილისში რამდენიმე საათის განმავლობაში ინტენსიურმა ნალექმა მოსახლეობას არაერთი პრობლემა შეუქმნა.

7 ივლისს თბილისის რამდენიმე უბანში დღის მეორე ნახევრიდან და საღამოს განვითარდა ძლიერი წვიმა, რომელსაც ადგილობრივად თან ახლდა ელჭექი და ქარის გაძლიერება. ინტენსიურმა ნალექმა დედაქალაქის ცალკეულ ქუჩებზე წყლის დაგროვება გამოიწვია, რის გამოც ავტომობილების გადაადგილება დროებით შეფერხდა. სოციალურ ქსელებში მოქალაქეები აქტიურად ავრცელებდნენ ვიდეოებს, სადაც ჩანდა დატბორილი გზები და უხვი ნალექი. ძლიერი წვიმა თბილისის საერთაშორისო აეროპორტის ტერიტორიაზეც დაფიქსირდა, სადაც შენობაში წყალი ჩავიდა და სოციალურ ქსელებში გავრცელებული ინფორმაციის თანახმად, ელექტროენერგიის მიწოდება დროებით შეიზღუდა.

მეტეოროლოგების განმარტებით, მსგავსი არამდგრადი ამინდი დასავლეთიდან შემოსულმა შედარებით გრილმა და ნოტიო ჰაერის მასებმა განაპირობა. მაღალი ტემპერატურის ფონზე ამან ძლიერი კონვექციური ღრუბლების განვითარებას შეუწყო ხელი, რაც ზაფხულისთვის დამახასიათებელ ხანმოკლე, თუმცა ინტენსიურ წვიმას, ელჭექსა და ადგილობრივად ძლიერ ქარს იწვევს.