თბილისი

მინიმუმ 10 ადამიანი დაიღუპა ბუტანში მას შემდეგ, რაც ძლიერმა წვიმებმა წყალდიდობა და მეწყერები გამოიწვია. ოფიციალური განცხადებით, რამდენიმე ადამიანი დაკარგულად ითვლება.

ბუტანის პრემიერ მინისტრმა, ლოტაი ჩერინგმა განაცხადა, რომ 16 ივნისს, დილით ადრე მომხდარი ტრაგედიის შედეგად, 5 ადამიანი დაშავდა, ორი მათგანი სერიოზულად.

სამაშველო სამუშაოები გრძელდება და დაჭრილთა ევაკუაციისთვის მობილიზებულია ვერტმფრენები. სამაშველო ჯგუფი, რომელშიც შედიან სამხედროები, გაგზავნეს დაზარალებულ რაიონში.

პრემიერ მინისტრმა სამძიმარი გამოუცხადა დაღუპულთა ოჯახებსა და ლაიას საზოგადოებას. მან ასევე მოუწოდა ხალხს, ქვეყნის მასშტაბით, მოერიდონ მდინარეების მახლობლად მდებარე ადგილებსა და გაითვალისწინონ წვიმების სეზონის დროს მოსალოდნელი საშიშროებები.

ბოლო რამდენიმე დღის განმავლობაში უხვმა ნალექმა გავლენა მოახდინა ნეპალის ნაწილებზეც. ზარალის სრული შეფასება ჯერ არ დასრულებულა.