Tbilisi

ალბათ, იცით, რომ ტელეფონები, პლანშეტები და სხვა გაჯეტები სიცხეში ხურდება და გამართულად არ მუშაობს. თუმცა ის თუ იცით, რომ ელექტრონული მოწყობილობის ადეკვატურად ფუნქციონირებას სიცივეც უშლის ხელს? დიახ, ეს სიმართლეა. სწორედ ამიტომ მნიშვნელოვანია, რომ თქვენი სმარტფონები თუ სხვა მოწყობილობები უარყოფითი ტემპერატურისგანაც დაიცვათ.

ყინვა ტელეფონის ელემენტს უქმნის პრობლემებს. Apple ოფიციალურად აცხადებს, რომ iPhone საუკეთესოდ მუშაობს 0-35 გრადუს ცელსიუს შუალედში. რა თქმა უნდა, პრობლემები სხვა ბრენდების სმარტფონებსაც ექმნებათ. ყინვაში ტელეფონი შეიძლება გაითიშოს, არ იმუშაოს სენსორმა, სწრაფად დაჯდეს ელემენტი. განსაკუთრებულ ყინვაში კი ეკრანი შეიძლება გაიბზაროს კიდეც.

ყინვისგან სმარტფონის დაცვაში ჩვენი რჩევები დაგეხმარებათ:

• სიცივეში ტელეფონი ყოველთვის ჩანთით ან ჯიბით ატარეთ. მას სასურველი ტემპერატურის შენარჩუნებაში თქვენი სხეულის სითბოც დაეხმარება.
• ეცადეთ, სიცივეში ყოფნის დროს სმარტფონი არ გამოიყენოთ. თუ ამ დროს მაინც გიწევთ დარეკვა, გამოიყენეთ ყურსასმენები, თავად მოწყობილობა კი ჯიბეში ან ჩანთაში დატოვეთ.
• ტელეფონი ყოველთვის გედოთ ქეისში. ცივ ჰაერსა და მოწყობილობას შორის ბარიერის შექმნა მას გადაციებისგან დაიცავს.
• არ დატოვოთ სმარტფონი მანქანაში. ეს განსაკუთრებით საშიშია, თუ მოწყობილობას მანქანაში მთელი ღამით ან უბრალოდ დიდი ხნით დატოვებთ. ასე შეიძლება ტელეფონი სამუდამოდ დაზიანდეს.
• თუ ტელეფონი სიცივეში გქონდათ, დასატენად შეერთებამდე ის აუცილებლად გაათბეთ. სიცივიდან სითბოში შესვლის შემდეგ კი ცოტა ხნით ოთახის ტემპერატურაზე გააჩერეთ და მხოლოდ შემდეგ გამოიყენეთ. გახსოვდეთ, რომ ტელეფონი არასდროს დატენოთ მინუს ტემპერატურაზე.

რჩევები საკმაოდ მარტივია, მათი გათვალისწინება კი რთული პრობლემებისგან დაგიცავთ.