ოზურგეთი

ნეპალში ძლიერმა წყალდიდობამ და მეწყერმა, ბოლო მონაცემების მიხედვით, 120-ზე მეტი ადამიანი იმსხვერპლა. ადგილობრივი მედიის ცნობით, ორდღიანი ინტენსიური წვიმის შემდეგ, რომელმაც დედაქალაქ კატმანდუს გარშემო მთელი ხეობა დატბორა, ათობით ადამიანი უგზო-უკვლოდ გაუჩინარდა.

როგორც ადგილობრივი მოსახლეობა მედიასთან ამბობს, მათ ერთი სახურავიდან მეორეზე უწევდათ ხტუნაობა, რათა ადიდებული წყლისთვის თავი დაეღწიათ.

სინოპტიკოსების თქმით, ნეპალში წვიმები სამშაბათამდე გაგრძელდება.

მთავრობის წარმომადგენლების ოფიციალური ცნობით, ამ დრომდე 3 000-ზე მეტი ადამიანის გადარჩენა მოხერხდა, თუმცა 60-ზე მეტი ადამიანი კვლავ დაკარგულად ითვლება.

ერთ-ერთი მაცხოვრებლის თქმით, წყალდიდობის მასშტაბები ამ სეზონზე უფრო ექსტრემალურია, ვიდრე ოდესმე: "წინა ჯერზე გაქცევა მაინც მოვახერხეთ, ახლა კი ყველა სახლი დაიტბორა. სახურავებზე მოგვიწია ხტუნაობა, რომ სამშვიდობოს გავსულიყავით".

სახელმწიფო მედიის ცნობით, სამძებრო-სამაშველო სამუშაოები კვლავ გრძელდება და მასში 10 000 პოლიციელი, ჯარისკაცი და მოხალისეა ჩართული.

ანა სიბოშვილი