თბილისი

გუშინდელი უამინდობის გამო, ბევრი რეგიონი დაზარალდა, მათ შორის: თეთრიწყაროს მუნიციპალიტეტის რამდენიმე სოფელი, ატენი, ქარელი, გვერძინეთი-ტყემლოვანას მონაკვეთი, კახეთის რამდენიმე სოფელი.

თეთრიწყაროს მუნიციპალიტეტში სტიქიამ სოფელ ირაგაში, ალექსეევკაში, ჭივჭავში, მაწევანში, ჩხიკვთაში, ჯორჯიაშვილში, ასურეთის ნაწილსა და ქალაქ თეთრიწყარო სასოფლო სამეურნეო სავარგულები დააზიანა. როგორც თეთრიწყაროს მუნიციპალიტეტის მერიაში აცხადებენ, სეტყვამ ძირითადად ხეხილი და საკარმიდამო ნაკვეთები დააზიანა, ზარალის დამთვლელი კომისია დღეიდან დაიწყებს მუშაობას.

სტიქიამ ახმეტის მუნიციპალიტეტის რამდენიმე სოფელი დააზარალა. დასეტყვილია ვენახები და მარცვლეული კულტურები. ადგილობრივების ინფორმაციით, სეტყვა 20 წუთის განმავლობაში გრძელდებოდა და ახლაც უამინდობაა.

სტიქიამ პრობლემები შექმნა საგარეჯოში და გურჯაანშიც. ძლიერმა ქარმა ხეები წააქცია, ხოლო უხვმა ნალექმა ცენტრალური გზის ნაწილი დატბორა.

უხვმა ნალექმა გორის მუნიციპალიტეტში, ატენის ხეობაში პრობლემები შექმნა. ძლიერმა წვიმამ მთიდან ქვა-ღორღი ჩამოიტანა და ატენის თემში შემავალი სოფლების დამაკავშირებელი გზა რამდენიმე ადგილზე ჩახერგა. გორის მუნიციპალიტეტის მერის ინფორმაციით, ამ დროისთვის, საავტომობილო გზაზე მოძრაობა აღდგენილია.

უხვმა ნალექმა პრობლემები შექმნა ქარელის მუნიციპალიტეტშიც. სოფლების - გვერძინეთი-ტყემლოვანას მონაკვეთზე, უხვი ნალექის შედეგად მთიდან მიწის მასა ჩამოიშალა და საავტომობილო გზა გადაკეტა.

ქარელის მუნიციპალიტეტის მერის ინფორმაციით, ამ დროისთვის მოძრაობა აღდგენილია.

წყარო: interpressnews.ge