ლაგოდეხი

მექაში ჰაჯის დროს დაღუპულთა რაოდენობა უკვე 1000-ს აჭარბებს. პილიგრიმთა დაღუპვის მიზეზი საუდის არაბეთში გაუსაძლისი სიცხეა. ბოლო ინფორმაციით, იმ ადგილებში სადაც მომლოცველები არიან ჰაერის ტემპერატურა 52 გრადუსია.

ზოგიერთი მედია წერს, რომ დაღუპულთა რიცხვმა 1081-ს მიაღწია. აღსანიშნავია, რომ ოფიციალურ პირებს დაღუპულთა შესახებ ოფიციალური ინფორმაცია არ გამოუქვეყნებია.

არსებული ინფორმაციით, გარდაცვლილთა უმეტესობა ეგვიპტელია.

ეგვიპტის საგარეო საქმეთა სამინისტროში არაფერს ამბობენ გარდაცვლილებზე, თუმცა აცხადებენ რომ მიმდინარეობს ჰაჯის დროს დაკარგული ეგვიპტელების სამძებრო სამუშაოები.

საუდის არაბეთის ხელისუფლების მონაცემებით, 2000-ზე მეტ მომლოცველს სიცხის გამო ჯანმრთელობის პრობლემები შეექმნა და მათ სამედიცინო დახმარება გაეწიათ, თუმცა ეს რიცხვი კვირა დღის შემდეგ აღარ განახლებულა.

ჰაჯის პილიგრიმობა ისლამის რელიგიაში ხუთი ძირითადი ბურჯიდან ერთ-ერთია და ყველა მუსლიმანმა, ვისაც შეუძლია, ის სულ მცირე, ერთხელ მაინც უნდა შეასრულოს სიცოცხლეში.

კლიმატის ცვლილების გამო, ამ რიტუალის შესრულება სულ უფრო რთულდება. საუდის არაბეთში გასულ თვეში გამოქვეყნებული კვლევის მიხედვით, რიტუალების შესრულების ადგილას ტემპერატურა ყოველ ათწლეულში 0.4 გრადუსით იზრდება.