English
Русский
ჩრდილოეთ ინდოეთში წყალდიდობას ბოლო სამ დღეში სულ ცოტა 15 ადამიანი ემსხვერპლა. ჰიმაჩალ პრადეშში წყალდიდობამ სახლები დააზიანა და ადამიანების სიცოცხლეს საფრთხე შეუქმნა. წყალდიდობის ზონაში მცხოვრები ერთ-ერთი ქალი შაბათს საღამოს მას შემდეგ გარდაიცვალა, რაც მისი სახლის ჭერი ჩამოინგრა და ქვეშ მოიყოლა. მსგავსი სიტუაციაა უტარაკჰანდში და დელიში, სადაც მთავრობამ დროებით სკოლები და კოლეჯებიც დაკეტა.
სოციალურ ქსელებში ინდოეთის არაერთი მოქალაქე გამოხატავდა იმედგაცრუებას იმის გამო, რომ ქვეყნის დედაქალაქმა სამდღიან წვიმას ვერ გაუძლო.
"არ ვიცი, რას აკეთებს მთავრობა. ეს პირველად წელს არ მომხდარა, ყოველ წელს ასეა", - ამბობს ადგილობრივი სარიტა გუპტა BBC-სთან ინტერვიუში.
ინდოეთის მეტეოროლოგიური დეპარტამენტი ხალხს აფრთხილებს, რომ ქვეყნის ჩრდილოეთში მდებარე რეგიონებში ძლიერი წვიმები კვლავაც მოსალოდნელია. წყალდიდობას მრავალი ფაქტორი განაპირობებს, მაგრამ ექსპერტები აცხადებენ, რომ გლობალური დათბობით გამოწვეული კლიმატის ცვლილება ძლიერი წვიმების მთავარი გამომწვევი მიზეზია.
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.