გონიო

კალენდრის მიხედვით, გაზაფხულის დადგომამდე თვეზე ნაკლები დრო დარჩა. თუმცა მეტეოროლოგები გვაფრთხილებენ, რომ ზამთარი ჯერ დასრულებას არ აპირებს.

ატლანტის ოკეანისა და წყნარი ოკეანის დინებების ნაკადზე გავლენას კვლავ მოახდენს „ლა ნინია“, მიუხედავად იმისა, რომ ის დასასრულს უახლოვდება.

ცივი დინებები წყნარ ოკეანეში უკვე სრულდება, რაც წესით გაზაფხულის მოახლოების მანიშნებელი უნდა იყოს. თუმცა მეტეოროლოგები გვაფრთხილებენ, რომ „ლა ნინია“ ზამთრიდან გაზაფხულზე გადაინაცვლებს და ზამთრის ამინდი გაზაფხულის დასაწყისშიც შენარჩუნდება.

„ლა-ნინია“, რომელიც მიმდინარე ამინდზე ახდენს გავლენას, კლიმატური ფენომენია და ის წყნარი ოკეანის ტროპიკული ნაწილის უჩვეულოდ ცივ ტემპერატურას გულისხმობს. ვლინდება წყნარი ოკეანის ცენტრალურ და აღმოსავლეთ ტროპიკულ ნაწილში, სამხრეთ ამერიკის დასავლეთ სანაპიროს გასწვრივ.

მისი საპირისპიროა „ელ-ნინიო“, თბილი სეზონური ზედაპირული დინება წყნარი ოკეანის აღმოსავლეთ ნაწილში. ის ჩნდება ცივი დინების გაქრობის შემდეგ და ერთ წელზე არანაკლები დროით გრძელდება.

ორივე მოვლენა მჭიდროდ არის დაკავშირებული ატმოსფერული წნევის ცვლილებებსა და მსხვილმასშტაბიანი ცირკულაციის რეჟიმებთან. ისინი არღვევენ ტროპიკული ნალექების და ატმოსფერული ცირკულაციის ნორმალურ რეჟიმს და ფართომასშტაბიან გავლენას ახდენენ მსოფლიოს სხვადასხვა ადგილების კლიმატზე, რასაც თან სდევს კლიმატთან დაკავშირებული შესაბამისი რისკები. დადგენილია, რომ „ელ-ნინიო“ და „ლა-ნინია“ 2 წლიდან 7 წლამდე პერიოდში მხოლოდ ერთხელ ხდება და ჩვეულებრივ, 9 თვიდან 12 თვემდე პერიოდით გრძელდება.