თბილისი

პოლარული ღამის შესახებ ალბათ ყველას გსმენიათ, მაგრამ ის თუ იცით, რომ აშშ-ის ყველაზე ჩრდილოეთით მდებარე ქალაქში მზე 67 დღის განმავლობაში არ ჩანს? არქტიკული წრიდან 300 მილის მოშორებით, ალასკას მწვერვალზე მდებარეობს ქალაქი უტქიაგვიკი, წარსულში ცნობილი, როგორც ბარროუ, სადაც 18 ნოემბერს ღამდება და მზე შემდეგი წლის 23 იანვრამდე აღარ ამოდის.

ქალაქის 5 000-მდე მაცხოვრებელი წელს ჰორიზონტზე მზეს პირველად 23 იანვარს დაინახავს. დღე დაახლოებით 70 წუთის განმავლობაში გაგრძელდება. ზოგადად, უკიდურეს ჩრდილოეთში მოკლე დღეებია. ნოემბრის პირველი რიცხვიდან ქალაქში 5 საათიანი დღეები დგება. 18 ნოემბერს კი მზე მხოლოდ 34 წუთით ამოდის და შემდეგ პოლარული ღამე იწყება.

პოლარული ღამის პერიოდში უტქიაგვიკში ჰაერის საშუალო ტემპერატურა -20 გრადუსია. მართალია, 23 იანვარს ქალაქში მზე ამოვა, მაგრამ ეს არ ნიშნავს, რომ დათბება. როგორც სინოპტიკოსები განმარტავენ, ქალაქში ყველაზე მეტი სიცივე იანვარში პოლარული ღამის დასრულების შემდეგ, მზის ამოსვლის პერიოდში ფიქსირდება.