თბილისი

2023 წელი 2022 წელზე უფრო ცხელი იქნება. ამის შესახებ ინფორმაციას დიდი ბრიტანეთის Met Office Weather Service ავრცელებს.

მათი პროგნოზით, 2023 წელი ერთ–ერთი ყველაზე ცხელი წელი იქნება გლობალურად. გასული 3 წელი შედარებით გრილი იყო, რასაც უჩვეულო ჰაერის ნაკადი, სახელად La Nina განაპირობებდა. აღნიშნული ნაკადის გამაგრილებელი მოქმედება 2023 წელს დასრულდება. სწორედ ამიტომ სინოპტიკოსები ჰაერის ტემპერატურის მატებას ვარაუდობენ.

ზოგადად, ბოლო 10 წელია, საშუალო ტემპერატურა უწყვეტად 1 გრადუსით მაღალია იმასთან შედარებით, რაც პრეინდუსტრიულ პერიოდამდე იყო. 1850 წლის შემდეგ ყველაზე ცხელი წელი 2016 წელი იყო.

ვარაუდი, რომ 2023 წელი ცხელი იქნება, შეიძლება ბევრს უჩვეულოდ მოეჩვენოს, განსაკუთრებით კი იმ ცივი შტორმების შემდეგ, რომლებიც აშშ–ში დაფიქსირდა. ჰაერის ტემპერატურის მკვეთრი ცვლილება და სხვადასხვა ტიპის შტორმები გლობალური დათბობის შედეგია. კატასტროფების წინაშე მთელი პლანეტა დგას, თუმცა კლიმატურ ცვლილებებს ზოგიერთი რეგიონი განსაკუთრებით მწვავედ განიცდის.