თბილისი

გიფიქრიათ, რატომ აქვს წვიმის ხმას ასეთი დამამშვიდებელი ეფექტი? რა არის წვიმის წვეთის ხმაში ისეთი, რაც ბევრად უფრო ადვილად და სწრაფად აძინებს ადამიანს?

ოდითგანვე, წვიმის ხმებს იყენებდნენ მარტივად დასაძინებლად. ეს ხმები ადამიანს ეხმარება მოდუნებაში. გარდა ამისა, უმეტესობას ძალიან უჭირს გაღვიძება მაშინ, როდესაც გარეთ წვიმს. თითქოს, სურვილიც უფრო დიდია წვიმის დროს ძილი გაიხანგრძლივო.

და მაინც, რატომ გვიყვარს წვიმის ხმა?

ეს კითხვა ძალიან ბევრჯერ დასვეს მეცნიერებმა. ერთ-ერთი მიზეზად შეიძლება ჩაითვალოს ღამის ხმების დაფარვა რამე სასიამოვნოთი. წვიმით გამოწვეული ხმა კი თითქოს მშვიდი მუსიკის როლს ასრულებს. მათთვის, ვინც ქალაქში ცხოვრობს, ღამე შეიძლება სავსე იყოს ხმებით, რომლებიც გამოფხიზლებას იწვევს. წვიმა, როგორც წესი, ბლოკავს ყველა სხვა ხმას და საშუალებას იძლევა მხოლოდ წვიმის ერთფეროვან ხმებზე გაამახვილოთ ყურადღება.

გარდა ამისა, ადამიანის გონება ძილის წინ ძალიან ბევრ რამეზე ფიქრობს, ამ ფიქრებზე ფოკუსირება კი ხელის შემშლელია დაძინებისთვის. წვიმის ხმა ადამიანს უფრო მეტი ყურადღებას ამახვილებინებს ამ მელოდიაზე, ვიდრე სხვა ფაქტორებზე. შედეგად, ადამიანი უფრო ადვილად ახერხებს დასვენებას და შესაბამისად, უფრო სწრაფად დაძინებას.

ზოგიერთი მეცნიერის ვარაუდით, კიდევ ერთი მიზეზი, თუ რატომაც უყვარს ადამიანს წვიმის ხმა ასე განსაკუთრებულად, შესაძლოა ადამიანის მუცლად ყოფნის დროს უკავშირდებოდეს. ჩასახვის მომენტიდან, ჩვენ, ყველანი, წყლით გარშემორტყმულ საშვილოსნოში ვატარებთ გარკვეულ პერიოდს. წვიმის ხმა, ქვეცნობიერულად მოქმედებს როგორც დამამშვიდებელი ელემენტი.

წვიმა რომანტიკასთანაც ასოცირდება. უამრავი სიმღერა არსებობს სიყვარულზე, წვიმის დროს. რომანტიკასა და წვიმას შორის კავშირიც შეიძლება ჩაითვალოს ერთ–ერთ ფაქტორად.