თბილისი

ფრანგი მეხანძრეები ქვეყნის ტურისტულ რეგიონ ვარში ტყის ხანძარს ებრძვიან. მედიის ინფორმაციით, ხანძარი სწრაფად ვრცელდება და მასთან გამკლავებას ძლიერი ქარი აბრკოლებს.

ვარის პრეფექტის ოფისში აცხადებენ, რომ ხანძრის შედეგად მთლიანად დაიწვა კარვების გასაშლელი ერთი ადგილი, 6 ასეთ ტერიტორიაზე კი ევაკუაცია განხორციელდა. გზებზე ქაოსის თავიდან ასაცილებლად, ხელისუფლებამ ადგილობრივების ნაწილს შინ დარჩენა და კარის ქვეშ სველი ზეწრების დაფენა ურჩია.

ხანძრის სალიკვიდაციო სამუშაოებში 900 მეხანძრე და სპეციალური სახანძრო თვითმფრინავებია ჩართული. ვარის პრეფექტის ოფისის ინფორმაციით, ამ დრომდე 5 000 ჰექტრამდე მიწაა დამწვარი.

ბოლო კვირების განმავლობაში ხმელთაშუა ზღვის რეგიონის დიდ ნაწილს ძლიერმა სიცხის ტალღებმა გადაუარა, რასაც ექსპერტები გლობალურ დათბობას უკავშირებენ.

წყარო: interpressnews.ge