თბილისი

თუ ევროპაში მოგზაურობას სექტემბერში გეგმავთ, სამხრეთ ევროპის ქალაქები განსაკუთრებით მიმზიდველი არჩევანია. კლიმატური მონაცემების მიხედვით, სექტემბერში ევროპის ყველაზე თბილ ქალაქებს შორისაა ათენი და რომი, სადაც დღის საშუალო მაქსიმუმი დაახლოებით 28°C-ს აღწევს. ლისაბონსა და ბარსელონაში დაახლოებით 26°C, ნიცაში კი დაახლოებით 25°C ფიქსირდება.

ათენი - მათთვის, ვისაც ზაფხულის გაგრძელება სურს

სექტემბერში ათენი ერთ-ერთი საუკეთესო არჩევანია მათთვის, ვისაც თბილი და ძირითადად მზიანი ამინდი სურს. ისტორიული მონაცემებით, დღის საშუალო მაქსიმალური ტემპერატურა დაახლოებით 28°C, ღამის კი დაახლოებით 20°C-ია. ამინდი განსაკუთრებით ხელსაყრელია ქალაქის მთავარი ღირსშესანიშნაობების :აკროპოლისის, პლაკისა და ძველი ათენის ქუჩების დასათვალიერებლად. დღის განმავლობაში ჯერ კიდევ ზაფხულის სითბოა, საღამოს კი ქალაქში სეირნობა სასიამოვნო ხდება.

ათენის კიდევ ერთი უპირატესობა ისაა, რომ ქალაქური მოგზაურობის გარდა შესაძლებელია ზღვის მიმართულებით გასვლაც. ამიტომ სექტემბერი კარგი არჩევანია მათთვის, ვისაც ისტორია, ქალაქის ცხოვრება და ზღვა ერთ მოგზაურობაში სურს.

რომი - იდეალური დრო ქალაქის ფეხით დასათვალიერებლად

რომი სექტემბერში განსაკუთრებით საინტერესოა. დღის საშუალო მაქსიმალური ტემპერატურა დაახლოებით 28°C-ია, ღამის კი - დაახლოებით 14°C. ამ დროს კოლიზეუმის, რომაული ფორუმის, პანთეონის, ტრევის შადრევნისა და სხვა ისტორიული ადგილების მონახულება გაცილებით სასიამოვნოა, როდესაც მთელი დღის განმავლობაში მაღალი ტემპერატურისგან თავის დაცვა არ გიწევთ. 2026 წლის მოგზაურობის რეკომენდაციებშიც რომი სექტემბრის ერთ-ერთ გამორჩეულ მიმართულებად სახელდება.

თუ მოგზაურობისას გსურთ ისტორია, არქიტექტურა, იტალიური სამზარეულო და თბილი ამინდი, რომი ერთ-ერთი ყველაზე უსაფრთხო არჩევანია.

ლისაბონი - თბილი ამინდი ატლანტის სანაპიროზე

ლისაბონი სექტემბერში დაახლოებით 26°C-იან დღის ტემპერატურას გვთავაზობს, ღამით კი საშუალოდ დაახლოებით 17°C არის. ქალაქის ქუჩებში ხანგრძლივი სეირნობა, ალფამის უბნის აღმოჩენა, ტრამვაით მგზავრობა და ქალაქის ხედების დათვალიერება სექტემბრის ზომიერ სითბოში ბევრად სასიამოვნოა, ვიდრე ზაფხულის ყველაზე ცხელ პერიოდში.

ლისაბონის უპირატესობა ისიცაა, რომ ქალაქიდან მარტივად შეიძლება სანაპიროს მიმართულებით გასვლა, მაგალითად, კაშკაიშისკენ. შესაბამისად, მოგზაურობა მხოლოდ ქალაქის ტურით არ შემოიფარგლება.

2026 წლის მოგზაურობის რეკომენდაციებში ლისაბონი სექტემბრისთვის განსაკუთრებით კარგ ქალაქადაა გამოყოფილი: ქალაქში ჯერ კიდევ თბილი ამინდია, ხოლო ზაფხულის პიკური დატვირთვა თანდათან მცირდება.

ბარსელონა - ქალაქი და ზღვა ერთ მოგზაურობაში

თუ მხოლოდ ქალაქის დათვალიერება არ გინდათ და მოგზაურობაში ზღვის ჩართვაც მნიშვნელოვანია, მაშინ ბარსელონა ერთ-ერთი საუკეთესო ვარიანტია.

სექტემბერში ბარსელონაში დღის საშუალო მაქსიმალური ტემპერატურა დაახლოებით 26°C, ღამის კი 17°C-ია. ეს ნიშნავს, რომ შესაძლებელია დილით საგრადა ფამილიას და გოთიკური კვარტლის დათვალიერება, დღის მეორე ნახევარში კი სანაპიროზე გადასვლა. სექტემბერში ხმელთაშუა ზღვა ჯერ კიდევ ზაფხულის სითბოს ინარჩუნებს.ამიტომ ბარსელონა განსაკუთრებით საინტერესოა მათთვის, ვისაც ერთ მოგზაურობაში არქიტექტურის, გასტრონომიის, ქალაქური ცხოვრების და პლაჟის გაერთიანება სურს.

ნიცა - საფრანგეთის რივიერა სექტემბრის მზეზე

სექტემბერში დღის საშუალო მაქსიმალური ტემპერატურა დაახლოებით 25°C, ღამის კი 17°C-ია. ეს ტემპერატურა განსაკუთრებით კარგია მათთვის, ვისაც 28–30°C-ზე მაღალი სიცხე არ უყვარს, მაგრამ მაინც სურს ზაფხულის ატმოსფერო.

ნიცის მთავარი უპირატესობა კი მისი მდებარეობაა. აქედან შესაძლებელია ერთდღიანი გასვლები კანის, ანტიბისა და მონაკოს მიმართულებით. ამიტომ ნიცის არჩევის შემთხვევაში შეგიძლიათ არა მხოლოდ ქალაქი, არამედ მთელი ფრანგული რივიერა აღმოაჩინოთ.