თბილისი

იტალიაში ძლიერი სიცხის ტალღა გრძელდება. ქვეყნის ჯანდაცვის სამინისტრომ 5 აგვისტოს 27 დიდ ქალაქში უმაღლესი, წითელი დონის მეტეოროლოგიური გაფრთხილება გამოაცხადა, რაც ნიშნავს, რომ მაღალი ტემპერატურა საფრთხეს უქმნის მთელი მოსახლეობის ჯანმრთელობას.

მეტეოროლოგების პროგნოზით, ქვეყნის სამხრეთ და ცენტრალურ რეგიონებში ჰაერის ტემპერატურა 40 გრადუსს უახლოვდება, ხოლო ზოგიერთ რაიონში ამ ნიშნულსაც აჭარბებს. ყველაზე მაღალი ტემპერატურა ფიქსირდება რომში, ფლორენციაში, ბოლონიაში, ნეაპოლსა და პალერმოში.

იტალიის ჯანდაცვის უწყება მოსახლეობას ურჩევს, დღის ყველაზე ცხელ პერიოდში – 11:00-დან 18:00 საათამდე შეძლებისდაგვარად მოერიდოს გარეთ ყოფნას, მიიღოს საკმარისი რაოდენობის სითხე და შეზღუდოს ფიზიკური დატვირთვა. განსაკუთრებული ყურადღება ეთმობა ხანდაზმულებს, ბავშვებსა და ქრონიკული დაავადებების მქონე ადამიანებს, თუმცა გაფრთხილება უკვე მთლიან მოსახლეობაზე ვრცელდება.

ადგილობრივი მედიის ინფორმაციით, მიმდინარე ზაფხულის ეს უკვე მეოთხე ინტენსიური სიცხის ტალღაა. მაღალი ტემპერატურა ღამის საათებშიც ნარჩუნდება, რაც განსაკუთრებით დიდ ქალაქებში დამატებით დისკომფორტს ქმნის.

სიცხემ მნიშვნელოვნად გაზარდა ტყის ხანძრების საფრთხეც. ქვეყნის სამხრეთ რეგიონებსა და კუნძულებზე საგანგებო სამსახურები გაძლიერებულ რეჟიმში მუშაობენ, ხოლო მოსახლეობას მოუწოდებენ, ბუნებრივ ტერიტორიებზე არ გამოიყენონ ღია ცეცხლი და დაიცვან ხანძარსაწინააღმდეგო წესები.

გაზრდილია ელექტროენერგიის მოხმარებაც, რადგან კონდიცირების სისტემების გამოყენება რეკორდულ მაჩვენებლებს აღწევს. მიუხედავად ენერგოსისტემაზე გაზრდილი დატვირთვისა, ამ ეტაპზე მოსახლეობისთვის ელექტროენერგიის მოხმარებაზე სავალდებულო შეზღუდვები არ დაწესებულა.

სპეციალისტები აღნიშნავენ, რომ იტალიაში ექსტრემალური სიცხის ტალღები ბოლო წლებში უფრო ხშირი და ხანგრძლივი ხდება. მათი შეფასებით, ხმელთაშუა ზღვის რეგიონი კლიმატის ცვლილების ერთ-ერთ ყველაზე მოწყვლად ზონად ყალიბდება, რაც მომავალშიც გაზრდის როგორც რეკორდულად მაღალი ტემპერატურის, ისე გვალვისა და ტყის ხანძრების რისკს.