თბილისი

ტაიფუნმა "რაგასამ" ჩინეთის სამხრეთ სანაპიროს 25 სექტემბერს მძიმედ დაარტყა. ძლიერი წვიმა და ქარი, რომლის სიჩქარეც 150 კმ/სთ-ს აჭარბებდა, მასობრივი ინფრასტრუქტურული ზიანის მიზეზი გახდა. განსაკუთრებით დაზარალდა ქალაქ იანგჯიანგი და მომიჯნავე ზღვისპირა ტერიტორიები.

მთავრობამ 400,000-ზე მეტი მოქალაქის ევაკუაცია განახორციელა. დროებით დაიკეტა სკოლები და გაჩერდა ტრანსპორტი. შეზღუდულია ელექტროენერგიის მიწოდება. სახანძრო და სამაშველო ჯგუფები 24-საათიან მზადყოფნაში არიან. შენჯენში დროებით დაიხურა აეროპორტიც.

შტორმის ჩავლის შემდეგ, უკვე გაწმენდითი სამუშაოები მიმდინარეობს. ოფიციალური მონაცემებით, მსხვერპლის შესახებ ინფორმაცია ჯერჯერობით არ დადასტურებულა. მიმდინარეობს ზარალის ზუსტი შეფასება.

ტაიფუნი "რაგასა" ტროპიკულ შტორმადაა გარდაქმნილი და თანდათან ტოვებს ჩინეთის სანაპიროს, თუმცა ადგილობრივებს კვლავ სიფრთხილისკენ მოუწოდებენ. მაღალია ძლიერი წვიმისა და მეწყრული პროცესების გააქტიურების რისკი.