თბილისი

ჰავაიზე საგანგებო მდგომარეობა გამოცხადდა ქარიშხლის გამო, რომელიც თან ახლავს ძლიერ ქარს, ინტენსიურ ნალექსა და სანაპიროზე დიდ ტალღებს. ქარიშხალი „კიკო“ წყნარი ოკეანის აღმოსავლეთ ნაწილში ჩამოყალიბდა, დღეების განმავლობაში გაძლიერდა და სხვადასხვა დროს სხვადასხვა კატეგორიით კლასიფიცირდებოდა.

„კიკო“ პირველად 31 აგვისტოს დაფიქსირდა წყნარი ოკეანის აღმოსავლეთ აუზში. დასავლეთის მიმართულებით გადაადგილებისას, 2 სექტემბერს ქარმა მნიშვნელოვნად იმატა და უკვე ქარიშხლის I კატეგორიას მიაღწია, როდესაც მისმა სიძლიერემ 119 კმ/სთ-ს გადააჭარბა. შემდგომ დღეებში ქარიშხალი უფრო გაძლიერდა და დროებით III და IV კატეგორიას მიაღწია, როცა მისი მუდმივი ქარის სიჩქარე 233 კმ/სთ-ს აღწევდა. სწორედ ამ პერიოდში ჰავაის მთავრობამ საგანგებო მდგომარეობა გამოაცხადა.

სინოპტიკოსების პროგნოზით, მიმდინარე კვირაში „კიკო“ შეასუსტდება და შესაძლოა კვლავ I კატეგორიის ქარიშხლად ან ტროპიკულ შტორმად იქცეს. მოლოდინია, რომ ის ჰავაის ჩრდილოეთით ჩაივლის და პარასკევისთვის კუნძულებს სრულად გასცდება.

თუმცა, მიუხედავად იმისა, რომ ქარიშხლის ძირითადი ნაწილი კუნძულებს პირდაპირ არ დაეტაკება, ადგილობრივ მოსახლეობას მაინც ელოდება ძლიერი ქარი, ინტენსიური ნალექები და ტალღების მნიშვნელოვანი მატება.