მცხეთა

გასულ კვირას სამხრეთ ევროპაში მნიშვნელოვანი სიცხის ტალღა დაფიქსირდა. ტემპერატურამ 40 °C-ს ბევრ ქვეყანაში, მათ შორის, ესპანეთში, პორტუგალიაში, საფრანგეთში, იტალიასა და საბერძნეთში გადააჭარბა.

პორტუგალიაში, კერძოდ ბეჟასა და ევორაში, ტემპერატურამ 43 °C–ს მიაღწია. ადგილობრივმა ხელისუფლებამ მოსახლეობა გააფრთხილა და მაქსიმალურად დახურულ სივრცეებში დარჩენისკენ მოუწოდა.

იტალიაში ჯანდაცვის სამინისტრომ საგანგებო სიტუაცია გამოაცხადა 21 ქალაქში, მათ შორის რომში, მილანში, ნაპოლსა და სირაკუზაში.

განსაკუთრებული სიცხე დაფიქსირდა საბერძნეთშიც, სადაც ათენში ხანძარიც გაჩნდა.

მართალია ასეთი მაღალი ტემპერატურა ევროპისთვის სახასიათო არ არის, მაგრამ მეცნიერები მომავალ წლებში აღნიშნული ტენდენციის შენარჩუნებას ვარაუდობენ. შედეგად კი მოსალოდნელია, რომ სიცხით გამოწვეული სიკვდილიანობის მაჩვენებელი გაიზარდოს.

როგორც უკვე აღვნიშნეთ, განსაკუთრებულად მაღალი ტემპერატურა დაფიქსირდა სირაკუზაშიც. 2021 წლის 11 აგვისტოს კი სწორედ სირაკუზის მახლობლად დაფიქსირდა ტემპერატურა 48.8 °C–ზე, რაც WMO–ს მიერ ოფიციალურად დადასტურებული ევროპის ყველაზე მაღალი ტემპერატურაა.