ბაქო

საქართველოში ამინდი ბოლო დღეებში ისევ გაუარესდა. თბილისსა და რეგიონებში წუხელ იწვიმა. გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსი სვეტლანა ნიორაძე ambebi.ge-სთან ამბობს, რომ ეს კვირა ცივი და ნალექიანი გვექნება.

"ახლა უარესად აგვიცივდება. 8 - 11 აპრილამდე საქართველოში კვლავ მოსალოდნელია წვიმა, ზოგან ძლიერი, მაღალ მთაში თოვლსაც ვვარაუდობთ. ასევე ვფიქრობთ, რომ დასავლეთის მიმართულებით გაძლიერდება ქარი, მათ შორის, დედაქალაქში. 10 აპრილს დედაქალაქის გარეუბნებში მოსალოდნელია 20-25 მ/წმ-მდე ქარი.

ზღვაზე ვვარაუდობთ 4-5 ბალიან შტორმს, ძლიერი წვიმების გამო შესაძლებელია მდინარეების მატება და წყალმოვარდნები. ზოგადად, 9 აპრილიდან მოსალოდნელია ცივი და დროგამოშვებით ნალექიანი ამინდი, რაც შენარჩუნდება კვირის ბოლომდე. ეს კვირა, სამწუხაროდ, ცივი და ნალექიანი იქნება".

გრძელვადიანი პროგნოზის მიხედვით, 13 აპრილიდან შედარებით გამოიდარებს, ჰაერის ტემპერატურა მოიმატებს, თუმცა თბილისსა და რიგ რეგიონებში კვლავაც მოსალოდნელია ხანმოკლე წვიმა.