ქართული
English
ზაფხული უამრავი ადამიანის საყვარელი სეზონია, რადგან ღია ცის ქვეშ გართობასა და აქტივობებს უკავშირდება. თუმცა გართობის დროს არ უნდა დაგვავიწყდეს ის ყოველდღიური საქმიანობა, რაც მანამდე ჩვენი ყოველდღიური ცხოვრების ნაწილი იყო. მაგალითად, ასეთია ვარჯიში სპორტულ დარბაზებსა თუ ღია ცის ქვეშ. თუმცა ამ დროს გარკვეული რეკომენდაციების დაცვაა საჭირო, რომ გადაჭარბებული ტემპერატურის გამო ჯანმრთელობის პრობლემები არ შეგვექმნას.
გთავაზობთ რეკომენდაციებს, რომლებიც ზაფხულში ვარჯიშის დროს უნდა გაითვალისწინოთ:
სწორად შეარჩიეთ დრო
ზაფხულში უმჯობესია ივარჯიშოთ დილით ადრე ან გვიან საღამოს, როცა ტემპერატურა მაქსიმუმ ზღვარზე არაა. ასევე გაითვალისწინეთ, რომ თუ თქვენ ღია სივრცეში ვარჯიში გიყვართ, დროებით ამაზე უარის თქმა მოგიწევთ.
შეცვალეთ ვარჯიშის სტილი
სასურველია ზაფხულში მოერიდოთ ინტენსიურ ვარჯიშს, რომ სხეული გადახურებისგან დაიცვათ. მეტი დრო დაუთმეთ დასვენებას ვარჯიშებს შორის. უპირატესობა მიანიჭეთ ისეთ აქტივობებს, რომლებიც წყალს უკავშირდება, მაგალითად, ცურვას, აკვააერობიკას...
მიიღეთ დიდი რაოდენობით წყალი
წყალი ყოველთვის აუცილებელია, ზაფხულში კი, როდესაც ორგანიზმი ბევრ სითხეს კარგავს, ამ საკითხს განსაკუთრებული ყურადღება უნდა მიაქციოთ. პარალელურად, მოერიდეთ შაქრის შემცველ გამაგრილებელ სასმელებს, რადგან ის დეჰიდრატაციას უწყობს ხელს.
ჩაიცვით შესაბამისად
ვარჯიშის დროს ტანსაცმელს ყოველთვის დიდი მნიშვნელობა აქვს, ზაფხულში კი ეს ორმაგად მნიშვნელოვანია. თქვენმა კანმა აუცილებლად უნდა ისუნთქოს.
მოუსმინეთ თქვენს სხეულს
ფიზიკური აქტივობა კარგია, მაგრამ ყოველთვის მოუსმინეთ თქვენს სხეულს. არ გადააჭარბოთ მის ლიმიტებს და ზედმეტად არ დააძალოთ საკუთარ თავს ვარჯიში.
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.