Тбилиси

ინდოეთის კოსმოსური კვლევის ორგანიზაციამ (ISRO) ბოლო იმედიც გადაიწურა, რომ მათი კოსმოსური ხომალდი, Chandrayaan-3, "გამოიღვიძებს". პარასკევს კოსმოსურმა სააგენტომ განაცხადა, რომ ისინი ხომალდთან და მის მთვარეზე მავალ როვერ Pragyaan-თან კავშირის აღდგენას ვეღარ ახერხებდნენ.

Chandrayaan-3 მთვარის სამხრეთ პოლუსზე აგვისტოში დაეშვა. ლანდერი, სახელად Vikram-ი და როვერი Pragyaan-ი, მთვარეზე ორი კვირის განმავლობაში მოძრაობდნენ, აგროვებდნენ მონაცემებს და იღებდნენ ფოტოებს. ისინი მთვარეზე ღამის დადგომისას (ღამე და დღე მთვარეზე 14-14 დღე გრძელდება) "დააძინეს", რათა მათი ბატარეები დამუხტულიყვნენ და მოდულებს მაშინ "გამოეღვიძათ", როცა მთვარეზე მზე ამოვიდოდა.

მთვარეზე ღამე 22 სექტემბერს დასრულდა, თუმცა Vikram-ი და Pragyaan-ი ამ დრომდე უმოქმედოდ არიან.

ორშაბათს ISRO-ს ყოფილი უფროსი, კირან კუმარი BBC-სთან ინტერვიუში ამბობდა, რომ "მთვარემავალის და ლანდერის "გამოღვიძების" შანსები ყოველ საათში მცირდებოდა“.

"ლანდერს და მთვარემავალს უამრავი ისეთი კომპონენტი აქვთ, რომელთაც მთვარის ზედმეტად ცივ ტემპერატურასთან გამკლავება გაუჭირდებოდათ“.

მან დასძინა, რომ მთვარის სამხრეთ პოლუსზე ტემპერატურა, ღამის განმავლობაში, -200C-დან -250C-მდე ეცემა.

"სხვა ქვესისტემები გამართულად რომც მუშაობდნენ, ამას ვერანაირად შევიტყობთ“, - აცხადებს კირან კუმარი.

ინდოეთი Chandrayaan-3-ის მისიით ისტორიაში უკვე შევიდა და გახდა პირველი ქვეყანა, რომელმაც კოსმოსური ხომალდი მთვარის სამხრეთ პოლუსთან წარმატებით დაუშვა. ის ასევე შეუერთდა იმ ქვეყნების სიას, რომელთაც მთვარეზე რბილ დაშვებას მიაღწიეს. ესენია: აშშ, ყოფილი საბჭოთა კავშირი და ჩინეთი.

ანა სიბოშვილი