Тбилиси

ევროპისთვის 2026 წლის ზაფხული განსაკუთრებით ცხელი აღმოჩნდა. ივნისი-აგვისტოს საშუალო ტემპერატურა ევროპაში ნორმაზე 1.17°C-ით მაღალი იყო და ეს პერიოდი კონტინენტის ისტორიაში მესამე ყველაზე თბილი ზაფხული გახდა. Copernicus Climate Change Service-ის მონაცემებით, დასავლეთ ევროპაში ზაფხული რეკორდული აღმოჩნდა. საფრანგეთში, ესპანეთში, იტალიაში, შვეიცარიასა და ავსტრიაში სეზონის საშუალო ტემპერატურამ რეკორდულ ნიშნულებს მიაღწია.

საინტერესოა, თუ რა ვითარებაა ამჟამად იმ ქვეყნებში, სადაც ზაფხული განსაკუთრებით ცხელი იყო.

ესპანეთი - 2026 წლის ზაფხული, ოფიციალური მეტეოროლოგიური სამსახურის AEMET-ის მიხედვით, დაკვირვებების ისტორიაში ყველაზე ცხელი იყო. რეკორდი სულ მცირე 1869 წლიდან მოყოლებული დაფიქსირდა. ზაფხულის სეზონი ფაქტობრივად ოთხ თვემდე გაგრძელდა და სექტემბრის დასაწყისშიც კვლავ ზაფხულისთვის დამახასიათებელი სიცხე იყო.

ამასთან, ქვეყნისთვის სითბო სექტემბრის ბოლოსაც არ დასრულებულა. უახლესი პროგნოზების მიხედვით, ესპანეთსა და პორტუგალიაში კვლავ მაღალი ტემპერატურაა მოსალოდნელი, ზოგიერთ რაიონში კი დღისით 35°C-ზე მეტი და ადგილობრივად დაახლოებით 40°C-მდეც.

საფრანგეთი - საფრანგეთშიც 2026 წლის ზაფხული რეკორდული იყო. Météo-France-ის მონაცემებით, ივნისი-აგვისტოს საშუალო ტემპერატურა 1900 წლის შემდეგ ყველაზე მაღალი მაჩვენებელი დაფიქსირდა.

სექტემბერშიც რამდენიმე ძლიერი სიცხის ეპიზოდი დაფიქსირდა. ახლა, თვის ბოლოს, სამხრეთ საფრანგეთში ტემპერატურა კვლავ 30°C-ს აჭარბებს და ქვეყნის მეტეოროლოგიური სამსახური აღნიშნავს, რომ ამინდი სეზონისთვის უჩვეულოდ თბილია.

იტალია - ზაფხულის სიცხის შემდეგ თბილი პერიოდი გრძელდება იტალიაშიც. Copernicus Climate Change Service-ის მონაცემებით, იტალიის დიდ ნაწილში ივნისი-აგვისტოს საშუალო ტემპერატურა მნიშვნელოვნად აღემატებოდა კლიმატურ ნორმას.

სექტემბრის დასაწყისშიც სამხრეთ ევროპაზე გავრცელებულმა სიცხის ტალღამ იტალიას მიაღწია და ზოგიერთ რაიონში ტემპერატურა 40°C-ს მიუახლოვდა. ახლა მდგომარეობა შედარებით შეიცვალა, თუმცა ხმელთაშუა ზღვის რეგიონში შემოდგომა კვლავ საკმაოდ თბილია.

საბერძნეთი - ქვეყანაში ზაფხულის ბოლოსა და სექტემბრის დასაწყისში ძლიერი სიცხის რამდენიმე ტალღა დაფიქსირდა, თუმცა სექტემბრის ბოლოს სურათი უკვე განსხვავებულია. მაგალითად, 25 სექტემბერს ათენში დღის ტემპერატურა დაახლოებით 25°C-ს, როდოსზე კი 26°C-ს აღწევს. ეს ნიშნავს, რომ საბერძნეთის კურორტებზე ზაფხულის სიცხე უკვე მნიშვნელოვნად შესუსტებულია, თუმცა ამინდი ჯერ კიდევ საკმაოდ თბილია და ზღვის სეზონიც ბევრ ადგილას გრძელდება.

პორტუგალია - ის ამჟამად კიდევ ერთი ქვეყანაა, სადაც ზაფხულის სიცხის კვალი განსაკუთრებით მკაფიოდ ჩანს. სექტემბრის ბოლოს დასავლეთ და სამხრეთ ევროპაზე გავრცელებული ახალი თბილი ჰაერის მასა იბერიის ნახევარკუნძულს მოიცავს. პროგნოზების მიხედვით, პორტუგალიის ზოგიერთ რაიონში ტემპერატურა 35°C-ს გადააჭარბებს და ადგილობრივად 40°C-საც მიუახლოვდება.