ქართული
English
საქართველოში ამინდი ხშირად სიურპრიზებითაა სავსე და ტემპერატურის უეცარი, მკვეთრი მატება ორგანიზმისთვის ყოველთვის სერიოზული გამოცდაა. როდესაც თერმომეტრის სვეტი სწრაფად მიიწევს ზევით, ჩვენს სხეულს ადაპტაციისთვის გარკვეული დრო სჭირდება. გაუწყლოება, თერმული გადახურება და გულ-სისხლძარღვთა სისტემის გადატვირთვა - ეს ის ძირითადი რისკებია, რომელთა წინაშეც უეცარი სიცხის დროს აღმოვჩნდებით ხოლმე.
ჯანმრთელობის პრობლემები თავიდან რომ ავიცილოთ, გთავაზობთ რამდენიმე ოქროს წესსა და პრაქტიკულ რჩევას, რომლებიც ცხელ დღეებში ორგანიზმის ტონუსის შენარჩუნებაში დაგეხმარებათ.
წყლის ბალანსი - სიცხეში ორგანიზმი გაძლიერებულად ოფლიანობს, რათა სხეული გააგრილოს. ოფლთან ერთად ვკარგავთ არა მხოლოდ სითხეს, არამედ სასიცოცხლოდ მნიშვნელოვან მარილებსა და ელექტროლიტებს. ამიტომ წყალი სვით რეგულარულად. ნუ დაელოდებით წყურვილის გრძნობას - ეს უკვე დაწყებული გაუწყლოების ნიშანია. ატარეთ წყლის ბოთლი ყველგან და სვით პატარა ყლუპებით მთელი დღის განმავლობაში. ავადროულად, მაქსიმალურად შეზღუდეთ ალკოჰოლი, ტკბილი გაზიანი სასმელები და კოფეინის მაღალი შემცველობის პროდუქტები. ისინი ხელს უწყობენ სითხის გამოდევნას ორგანიზმიდან და კიდევ უფრო აძლიერებენ გაუწყლოებას. მოერიდეთ ყინულიანი წყლის დალევას. ძალიან ცივი სასმელი იწვევს სისხლძარღვების სპაზმს და ორგანიზმს უჭირს მისი ათვისება. უმჯობესია ოთახის ტემპერატურის ან ოდნავ გრილი წყალი.
კვების რაციონი - მძიმე და ცხიმიანი საკვების მონელება ორგანიზმისგან დიდ ენერგიას და დამატებითი სითბოს გამომუშავებას მოითხოვს, რაც სიცხეში ზედმეტი ტვირთია. ამიტომ ეცადეთ, თქვენი მენიუ იყოს შედარებით მსუბუქი. მიირთვით მეტი ხილი და ბოსტნეული, რომლებიც თავად შეიცავენ დიდი რაოდენობით წყალს (საზამთრო, კიტრი, პომიდორი, მწვანილი). ჭამეთ ხშირად და მცირე ულუფებით. მოერიდეთ მლაშე, ცხარე და შემწვარ კერძებს, რადგან მარილი ორგანიზმში სითხის დისბალანსს იწვევს.
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.