ქართული
English
წყნარი ოკეანის დასავლეთ ნაწილში მძლავრი სუპერტაიფუნი „სინლაკუ“ მარიანას არქიპელაგს უახლოვდება. სინოპტიკოსების შეფასებით, ეს არის 2026 წლის ყველაზე ძლიერი შტორმი დედამიწაზე, რომელმაც უკვე მიაღწია მე-5 კატეგორიის ქარიშხლის სიმძლავრეს. სტიქია საფრთხეს უქმნის აშშ-ის შორეულ ტერიტორიებს — გუამსა და ჩრდილოეთ მარიანას კუნძულებს.
შტორმის სიმძლავრე და მოძრაობის ტრაექტორია
აშშ-ის ტაიფუნების გაფრთხილების გაერთიანებული ცენტრის (JTWC) მონაცემებით, „სინლაკუს“ მდგრადი ქარის სიჩქარე საათში 278 კილომეტრს (173 მილი/სთ) აღწევს. მიუხედავად იმისა, რომ კუნძულებთან მიახლოებისას მისი მცირედი დასუსტებას მოსალოდნელი, ის მაინც შეინარჩუნებს მე-4 ან მე-5 კატეგორიის სიმძლავრეს.
გუამის მეტეოროლოგიური სამსახურის წამყვანმა სპეციალისტმა, ჯოშუა შანკმა აღნიშნა, რომ ტაიფუნის ეპიცენტრი ძირითადად ტინიანისა და საიპანის კუნძულების გასწვრივ გაივლის. კუნძულ გუამს, სადაც 170 000-მდე ადამიანი ცხოვრობს და მნიშვნელოვანი ამერიკული სამხედრო ბაზებია განთავსებული, სავარაუდოდ, სტიქიის ცენტრი პირდაპირ არ დაარტყამს, თუმცა იქ მაინც ნარჩუნდება ტროპიკული შტორმის საფრთხე და ძლიერი ქარი.
მოსალოდნელი საფრთხეები
ქარმა შესაძლოა დააზიანოს შენობების სახურავები, მოგლიჯოს ხეები და მწყობრიდან გამოიყვანოს ელექტროგადამცემი ხაზები. პროგნოზირებულია 300 მმ-ზე მეტი ნალექი, რამაც შესაძლოა გამოიწვიოს მყისიერი წყალდიდობები და მეწყრული პროცესები. მოსალოდნელია ელექტროენერგიისა და წყლის მიწოდების შეფერხება რამდენიმე დღის ან კვირის განმავლობაში.
საგანგებო ზომები
კუნძულებზე საგანგებო მდგომარეობაა გამოცხადებული. აშშ-ის პრეზიდენტმა უკვე დაამტკიცა ფედერალური დახმარების პაკეტი გუამისა და ჩრდილოეთ მარიანას კუნძულებისთვის. ადგილზე მობილიზებულია საგანგებო სიტუაციების მართვის ფედერალური სააგენტოს (FEMA) ასობით თანამშრომელი.
ადგილობრივი მცხოვრებლები ამ რეგიონს ხშირად „ტაიფუნების ხეივანს“ უწოდებენ, თუმცა აპრილის თვეში ასეთი სიმძლავრის სტიქია უჩვეულო მოვლენაა. სპეციალისტები ამას წყნარ ოკეანეში წყლის ტემპერატურის მატებასა და „ელ-ნინიოს“ (El Niño) ფენომენის გააქტიურებას უკავშირებენ, რაც 2026 წლის სეზონზე კიდევ უფრო მეტ და მძლავრ შტორმს მოასწავებს.
მოსახლეობას მოუწოდებენ, თავი შეაფარონ ბეტონის მყარ ნაგებობებს და მოერიდონ სანაპირო ზოლს, სადაც ტალღების სიმაღლემ შესაძლოა კრიტიკულ ზღვარს მიაღწიოს.
გმადლობთ, თქვენი კომენტარი მიღებულია და გამოქვეყნდება მოდერაციის შემდეგ.